Kya Nakih Ka Gawahoon Ko Pehchanna Zaroori Hai

نہ ناکح کا شاہدین کو پہچاننا ضرور، نہ شاہدین کا وقت عقد کچھ بولنا ضرور، نہ خاص نکاح یا زوجیت ضرور، نہ صرف فلاں عورت کہنے میں محذور، جبکہ تنہا اسی قدر سے اس کی معرفت ہوجائے، شاہدین کا معًا لفظین ایجاب وقبول کو سننا اور اتنا سمجھنا کہ یہ نکاح ہو رہاہے اور لفظ نکاح وتزویج ہو نا یا کوئی اور لفظ جوتملیك عین فی الحال کے لیے وضع کیا گیا اور شاہدین کے نزدیك عاقدین اعنی زوج وزوجہ کا متمیز ہوجانا خواہ بحضور و رؤیت واشارہ یا بغیبت وتسمیۂ مجردہ یا مع نسبت وغیرہ متمیزات میں اس قدر ضرور ہے اور شك نہیں کہ کسی مرد کو اتنے مہر پر عورت کا دیا جانا مفید معنی نکاح ہے توصورت مستفسرہ میں اگر باقی شرائط مذکورہ مجتمع تھے نکاح درست ہوگیا، ’’والمسائل کلھا مصرحۃ في الدرالمختار وغیرہ من معتمدات الأسفار‘‘ (ان تمام مسائل کی تصریح درمختار اور دیگر معتمد کتب میں موجود ہے۔ ت)واللہ تعالیٰ أعلم۔

(فتاوی رضویہ ،ج:11، ص: 217، کتاب النکاح ، ط: برکات رضا، پوربندر، گجرات)