Kya Teen Baar Qabool Karna Shart Hai

نکاح خواہ کسی عقد میں تین بار قبول اصلاً ضرورنہیں ایك ہی بار کافی ہے، اور تین بار تین طرح الفاظ قبول اداہونا کچھ مضر نہیں، ہاں اگر گھبراہٹ میں بجائے قبول بعض الفاظ رد و انکار کےاداہوں تو یہ دیکھا جائے گا کہ پہلے لفظ ’’قبول‘‘ کہا تھا تو نکاح ہوگیا کہ بعد تمامی عقد رد وانکار مانعِ انعقاد نہیں، اورپہلے لفظ’’انکار‘‘نکلا تو وہ ایجاب ردہوگیا، اب جو اس کے بعد اس نے لفظ’’قبول‘‘ کہا یہ اس کی طرف سے ایجاب ہوا، اگر اس مجلس میں ادھر سے لفظ ’’قبول‘‘ متحقق ہوا منعقد ہوجائے گا ورنہ باطل ہوجائے گا، اور اگر متعدد الفاظ میں لفظ ردکوئی نہیں تھا ہاں ایسے الفاظ تھے کہ قبول نہ ٹھہریں تو وہ خواہ پہلے ہوں یا پیچھے جبکہ مجلس بدلنے سے پہلے ایك لفظ بھی قبول صحیح کا ادا ہوگا نکاح ہوجائے گا ’’لأن الفور غیر شرط والمجلس یجمع المتفرق‘‘(کیونکہ فورًا قبول کرنا شرط نہیں اور مجلس جامع متفرقات ہے۔ ت) اور ایجاب عورت کی طرف سے ہو یا مر دکی طرف سے دونوں درست ہیں، عقودمیں ایجاب وقبول کچھ متعین نہیں، عاقدین میں جس کی طرف سے الفاظِ عقد پہلے صادر ہوں گے، ان کا نام’’ایجاب‘‘رکھا جائے گا ان کے جوا ب میں دوسرا جوکہے گا وہ قبول قرار پائے گا، مثلًا عورت نے مر دسے کہا’’میں نے تجھے اپنی زوجیت میں قبول کیا‘‘یہ ایجاب ہوا اگرچہ بلفظ قبول ہے، مرد نے اس کے جواب میں کہا’’میں نے تجھے اپنی زوجیت میں لیا‘‘یہ قبول ہوا اگرچہ بلفظ قبول نہیں۔ واللہ تعالیٰ أعلم۔

(فتاوی رضویہ ، ج:11، ص:218، کتاب النکاح ، ط: برکات رضا، پوربندر، گجرات)